Búgin Almatyda  «Rýhanı jańǵyrý» baǵdarlamasy aıasynda Jeńis kúnine arnalǵan avtosherý ótti.

Keńes Odaǵynyń Batyrlary, Ekinshi dúnıejúzilik soǵysyna qatysqan ata-babalary - maıdangerlerdiń portretteri japsyrylǵan  20 shaqty  avtokólik qalanyń ortalyq kóshelerimen júrip ótti.

Erekshe aksıa 9-mamyr Jeńis kúnine oraı arnaıy uıymdastyryldy.

Avtosherý Qazaqstan Respýblıkasy Tuńǵysh Prezıdentiniń saıabaǵynda, Panfılov kóshesinde, Astana alańynda, Táýelsizdik monýmenti ornalasqan ortalyq alańda, 28 Panfılovshylar atyndaǵy saıabaqta boldy.

«Bul sharany uıymdastyrǵandaǵy maqsat - eli úshin erlikpen qaza tapqandarǵa qurmet kórsetý. Turǵyndar nazaryn ata-babalarymyzdyń erligine aýdarý, eske alý, jas urpaqtyń soǵysta erlikpen qaza tapqandarǵa degen qurmet pen súıispenshilik sezimin oıatýǵa úles qosý, óskeleń urpaqty patrıottyq sezimge baýlý, adamgershilik qundylyqqa, belsendi ómir saltyna tárbıeleý bolyp otyr», - dedi joba jetekshisi Álibek Abdýlla.

Atalǵan aksıa  Elbasynyń «Rýhanı jańǵyrý» baǵdarlamasy aıasynda 9-mamyr Jeńis kúnine,  maıdanda erlikpen qaza tapqan erler rýhyna arnalady.

Dál osy shara erteń Astana qalasynda jalǵasatyn bolady.